ಪೆರ್ಲ : ನಾಲಂದ ಮಹಾವಿದ್ಯಾಲಯದಲ್ಲಿ ಕಾಲೇಜಿ ಅರ್ಥಶಾಸ್ತ್ರ ವಿಭಾಗ ಮತ್ತು ವಾಣಿಜ್ಯ ಶಾಸ್ತ್ರ ವಿಭಾಗ ಹಾಗೂ ವಿವೇಕಾನಂದ ಕಾಲೇಜು ಪುತ್ತೂರು ಇದರ ಸಂಯುಕ್ತ ಆಶ್ರಯದಲ್ಲಿ ಡಿಜಿಟಲ್ ಮತ್ತು ಕ್ಯಾಶ್ಲೆಶ್ ಸಿಸ್ಟಮ್ ಎಂಬ ವಿಷಯದಲ್ಲಿ ಅಂತರಾಷ್ಟ್ರೀಯ ಮಟ್ಟದ ವಿಚಾರಗೋಷ್ಠಿ ನಡೆಯಿತು. ವಿಚಾರಗೋಷ್ಠಿಯನ್ನು
ಸುಧೀರ್‌ಕುಮಾರ್ ಶೆಟ್ಟಿ ಎಣ್ಮಕಜೆ ಯು.ಎ. ಇಇದರ ನಿರ್ದೇಶಕರು ಮತ್ತು ಅಧ್ಯಕ್ಷರು ಯು.ಎ.ಇ ಎಕ್ಸೇಂಜ್ .ಯಲ್.ಯಲ್.ಸಿ. ಅವರು ದೀಪ ಬೆಳಗಿಸಿ ಉದ್ಘಾಟಿಸಿದರು.
ಶ್ರೀ ಸುಧೀರ್‌ಕುಮಾರ್ ಶೆಟ್ಟಿ ಎಣ್ಮಕಜೆ ಅವರು ಡಿಜಿಟಲ್& ಕ್ಯಾಶ್ಲೆಶ್ ಸಿಸ್ಟಮ್ ಎಂಬ ವಿಷಯದಲ್ಲಿ ಮಾತಾನಾಡಿದರು. ಸರಕಾರ ಜಾರಿಗೊಳಿಸಿದ ಅನಾಣ್ಯೀಕರಣ (ಚಲಾವಣೆ ರದ್ದು ಮಾಡಿದ) ದಪರಿಣಾಮ ಹಾಗೂ ನಗದುರಹಿತ ವ್ಯವಹಾರದ ಮೂಲಕ ದೇಶದ ಪ್ರಗತಿಯಬಗ್ಗೆ ಸವಿವರವಾಗಿ ವಿಷಯ ಮಂಡಿಸಿದರು. ಕಾಳಧನ ಹಾಗೂ ಖೋಟಾನೋಟುಗಳಿಗೆ ಕಡಿವಾಣ ಹಾಕಲು ಸರಕಾರ ಇತ್ತೀಚೆಗಷ್ಟೇ 500 ಮತ್ತು 1000 ಮುಖಬೆಲೆಯ ನೋಟುಗಳನ್ನು ರದ್ದುಮಾಡಿತ್ತು. ತಾತ್ಕಾಲಿಕ ಆರ್ಥಿಕ ಅಡಚಣೆ ಸೃಷ್ಟಿಯಾಗಿತ್ತಾದರೂ, ಭವಿಷ್ಯದಲ್ಲಿ ಶೀಘ್ರ ಆರ್ಥಿಕ ಬೆಳವಣಿಗೆ ಕಾಣಲು ಹಾಗೂ ಸರಕು, ಸೇವೆಗಳು ವ್ಯವಸ್ಥಿತವಾಗಿ ಲಭ್ಯವಾಗಲು ಭ್ರಷ್ಟಾಚಾರರಹಿತ ದೇಶ ಸೃಷ್ಟಿಯಾಗಬೇಕಿದೆ ಈ ನಿಟ್ಟಿನಲ್ಲಿ ಅನಾಣ್ಯೀಕರಣವು ಸರಕಾರದ ದಿಟ್ಟ ಹೆಜ್ಜೆ ಎಂದರು. ಜಾಗತಿಕ ಮಟ್ಟದಲ್ಲಿ ಭಾರತವು ಅತೀ ಹೆಚ್ಚು ಮಾನವ ಸಂಪನ್ಮೂಲ ಹೊಂದಿದ ರಾಷ್ಟ್ರ, ನಗದುರಹಿತ ವ್ಯವಹಾರದ ಮೂಲಕ ದೀರ್ಘಾವಧಿಯಲ್ಲಿ ಉತ್ಪಾದನೆ ಕ್ಷಮತೆ ಗಣನೀಯ ಮಟ್ಟದಲ್ಲಿ ಹೆಚ್ಚಲಿದೆ. ದೇಶದಲ್ಲಿ ರಾಷ್ಟ್ರೀಯ ಆದಾಯ ಹೆಚ್ಚಳದಿಂದ, ಮೂಲಭೂತ ಸೌಕರ್ಯಗಳು ಪೂರ್ಣಗೊಂಡು ಸಮಾನತೆ, ಉದ್ಯೋಗ ಸೃಷ್ಟಿ, ಬಡತನ ನಿವಾರಣೆಗಳ ಮೂಲಕ ದೇಶವು ಸರ್ವತೋಮುಖ ಅಭಿವೃದ್ಧಿಯಾಗಲಿದೆ ಎಂದು ಅಭಿಪ್ರಾಯಪಟ್ಟರು.
ಸರಕಾರಕ್ಕೆ ತೆರಿಗೆಯು ಸಮರ್ಪಕ ರೀತಿಯಲ್ಲಿ ಪಾವತಿಯಾದರೆ ಮಾತ್ರ ಸರಕಾರದ ಕೆಲಸ ಕಾರ್ಯಗಳು ಸುಸೂತ್ರವಾಗಿ ನೆರವೇರುತ್ತದೆ ಮಾತ್ರವಲ್ಲ ಜನತೆಗೆ ದಕ್ಷ ಆಡಳಿತ ನೀರಿಕ್ಷಿಸಲು ಸಾಧ್ಯ. ಆರ್ಥಿಕ ವ್ಯವಸ್ಥೆಯು ಸಂಪೂರ್ಣ ಸಂಘಟಿತ ಬ್ಯಾಂಕಿಂಗ್‌ ವಲಯದಿಂದಲೇ ನಿರ್ವಹಣೆಯಾಗಿ, ನಗದುರಹಿತ ವ್ಯವಹಾರದೊಂದಿಗೆ ಮುನ್ನಡೆದರೆ ದೇಶವು ಮುಂದಿನ ದಿನಗಳಲ್ಲಿ ಪ್ರಪಂಚದಲ್ಲೇ ಅತ್ಯಂತ ಶ್ರೀಮಂತ ದೇಶವಾಗಲಿದೆ.
ನಗದುರಹಿತ ವ್ಯವಹಾರದಿಂದ ಸುಸಜ್ಜಿತ ಆರ್ಥಿಕ ವ್ಯವಸ್ಥೆ ರೂಪುಗೊಳ್ಳುವುದರ ಜೊತೆಗೆ ಸಾಮಾಜಿಕ ಕೆಡುಕುಗಳ ನಿಯಂತ್ರಣ, ಭಯೋತ್ಪಾದನಾ ಚಟುವಟಿಕೆಗಳಿಗೆ ರವಾನೆಯಾಗುವ ಹಣದ ಪೂರೈಕೆಗೆ ಕಡಿವಾಣ ಬೀಳಲಿದೆ.
ಏಕ ತೆರಿಗೆ ಪದ್ಧತಿಯಾದ ಸರಕು ಮತ್ತು ಸೇವಾ ತೆರಿಗೆ (ಜಿ.ಯಸ್.ಟಿ)ಯು ಅಂತಾರಾಜ್ಯ ಸುಂಕ ನಿಗಾಘಟಕದ ಹೆಚ್ಚ್ಚುವರಿ ಕೆಲಸ ಹಾಗೂ ವಿಳಂಬ ಪ್ರಕ್ರಿಯೆಗಳ ದುಷ್ಪಾರಿಣಾಮಗಳನ್ನು ನಿವಾರಣೆ ಮಾಡುವಲ್ಲಿ ಸಹಕರಿಸಬಹುದು. ನಗದುರಹಿತ ವ್ಯವಹಾರದ ಬಗ್ಗೆ ಜನಸಾಮಾನ್ಯರಿಗೆ ಶಿಕ್ಷಣ ದೊರೆಯಬೇಕು. ಮಾಜಿರಾಷ್ಟ್ರಪತಿ ಎ.ಪಿ.ಜೆ.ಅಬ್ದುಲ್ ಕಲಾಂ ಅವರ ಕನಸಿನ ಭಾರತ ಸಕಾರಗೊಳ್ಳುವತ್ತ ಪ್ರಸ್ತುತ ಸರಕಾರದ ದ್ಯೇಯೋದ್ಧೇಶ ಪರಿಪೂರಕ. ಶ್ರೀಮಂತ ಭಾರತದಲ್ಲಿ ಪ್ರಜೆಯಾಗಿರುವುದು ಇಂದಿನ ಯುವಜನತೆಯ ಭಾಗ್ಯ !ಈ ನಿಟ್ಟಿನಲ್ಲಿ ಸರಕಾರದ ಯೋಜನೆಗಳಲ್ಲಿ ಕೈಜೋಡಿಸುವುದು ಅತ್ಯಗತ್ಯ ಎಂದು ವಿವರಿಸಿದರು.
ಕಾಲೇಜಿನ ಪ್ರಿನ್ಸಿಪಾಲ್ ಶ್ರೀ ಯಸ್. ಯನ್ ಹೊಳ್ಳ ತಮ್ಮ ಪ್ರಾಸ್ತಾವಿಕ ಭಾಷಣದಲ್ಲಿ ಅತ್ಯಂತ ಪ್ರಸ್ತುತವಾದ ವಿಷಯದ ಬಗ್ಗೆ ಮಾಡುತ್ತಿರುವ ವಿಚಾರ ಸಂಕಿರಣ ಫಲಪ್ರದವಾಗಲಿದೆ. ಯುವಜನತೆ ಕ್ಯಾಶ್ಲೆಶ್ ಸೊಸೈಟಿಯ ಬಗ್ಗೆ ಶಿಕ್ಷಣ ಪಡೆದು ಸಮಾಜದ ಎಲ್ಲೆಡೆಯಲ್ಲೂ ಅದರ ಪ್ರಯೋಜನ ಲಭಿಸುವಂತೆ ಕಾರ್ಯ ಪ್ರವೃತ್ತರಾಗಬೇಕು ಎಂದು ನುಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ನಾಲಂದ ಮಹಾವಿದ್ಯಾಲಯದ ಆಡಳಿತ ಮಂಡಳಿಯ ಖಜಾಂಜಿಯಾದ ಶ್ರೀಯುತ ಗೋಪಾಲ್‌ಚೆಟ್ಟಿಯಾರ್ ವಹಿಸಿದ್ದರು. ಭ್ರಷ್ಟಾಚಾರ ತಡೆಗಟ್ಟುವಲ್ಲಿ ಸರಕಾರ ಅನೇಕ ಕಾರ್ಯಕ್ರಮಗಳನ್ನು ರೂಪಿಸುತ್ತಲೇ ಬಂದಿದೆ. ಮುಂದಿನ ದಿನಗಳಲ್ಲಿ ಭ್ರಷ್ಟರಿಗೆ ಉಳಿಗಾಲವಿಲ್ಲ, ಸಾಮಾಜಿಕ ದುಷ್ಕೃತ್ಯಗಳಿಗೆ ಕಡಿವಾಣ ಬೀಳುವುದರ ಜೊತೆಗೆ ಪಾರದರ್ಶಕ ಆಡಳಿತ ವ್ಯವಸ್ಥೆ ಸುದೃಢವಾಗುತ್ತಾ ಭಾರತ ಅತ್ಯಂತ ಪ್ರಬಲ ರಾಷ್ಟ್ರವಾಗುತ್ತದೆ ಎಂದು ತಮ್ಮ ಅಧ್ಯಕ್ಷೀಯ ಭಾಷಣದಲ್ಲಿ ಹೇಳಿದರು.
ಶಂಕರನಾರಾಯಣ ಖಂಡಿಗೆ ಉಪಾಧ್ಯಕ್ಷರು, ಕ್ಯಾಂಪ್ಕೋ ಲಿಮಿಟೆಡ್ ಮಂಗಳೂರು, ವಿಘ್ನೇಶ್ವರ ವರ್ಮುಡಿ ಶೈಕ್ಷಣಿಕ ನಿರ್ದೇಶಕರು ವಿವೇಕನಾಂದ ಕಾಲೇಜು ಪುತ್ತೂರು ವೇದಿಕೆಯಲ್ಲಿ ಉಪಸ್ಥಿತರಿದ್ದರು.
ಅರ್ಥಶಾಸ್ತ್ರ ವಿಭಾಗ ಮುಖ್ಯಸ್ಥರಾದ ಶ್ರೀ ಅಶೋಕ್ ಮೊಟ್ಟಕುಂಜ ಕಾರ್ಯಕ್ರಮಕ್ಕೆ ವಂದನಾರ್ಪಣೆ ಮಾಡಿದರು. ವಾಣಿಜ್ಯಶಾಸ್ತ್ರ ವಿಭಾಗದ ಕುಮಾರಿ ಗೀತಾ ಕಾರ್ಯಕ್ರಮ ನಿರೂಪಿಸಿದರು.