ಪೆರ್ಲ ನಾಲಂದ ಕಾಲೇಜಿನಲ್ಲಿ ಶೈಕ್ಷಣಿಕ ಸಮಾವೇಶ ಉದ್ಘಾಟಿಸಿ ಕೊಂಡೆವೂರು ಸ್ವಾಮೀಜಿ
ಮೀನುಗಳು ನಿತ್ಯ ನಿರಂತರ ತಟಾಕದಲ್ಲಿ ಸಂಚರಿಸಿ ನೀರಿನ ಕಷ್ಮಲಗಳನ್ನು ನಿವಾರಿಸಿ ತಮ್ಮ ಜೀವನಕ್ಕೆ ಪೂರಕವಾದ ವಾತಾವರಣ ಸೃಷ್ಟಿಸುವಂತೆ ನಮ್ಮ ಉಳಿವು ಹಾಗೂ ಸುರಕ್ಷಿತ ಬದುಕಿಗೆ ಪೂರಕವಾಗಿ ದೇಶ ಕಟ್ಟುವ ಕಾಯಕದಲ್ಲಿ ಪ್ರತಿಯೊಬ್ಬರೂ ತೊಡಗಬೇಕು ಎಂದು ಕೊಂಡೆವೂರು ಶ್ರೀಕ್ಷೇತ್ರದ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿ ಹೇಳಿದರು.
ಪೆರ್ಲ ನಾಲಂದ ಕಾಲೇಜಿನಲ್ಲಿ ಶನಿವಾರ ನಡೆದ ’ಶಿಕ್ಷಣ ದೃಷ್ಟಿ ಮತ್ತು ದಿಕ್ಕು’ ಶೈಕ್ಷಣಿಕ ಸಮಾವೇಶವನ್ನು ದೀಪ ಬೆಳಗಿಸಿ ಉದ್ಘಾಟಿಸಿ ಆಶೀರ್ವಚನ ನೀಡಿದರು.
ಗತ್ತು ಬಹಳ ಹಿಂದಿನಿಂದಲೂ ಭಾರತವನ್ನು ಗಮನಿಸುತ್ತಿದೆ. ಈಗಲೂ ಗಮನಿಸುತ್ತಿದೆ. ಇಲ್ಲಿನ ಆಧ್ಯಾತ್ಮಿಕ ಚಿಂತನೆಗಳು ದೇಶಕ್ಕೆ ಮಾತ್ರ ಸೀಮಿತವಾಗದೆ ಸಮಸ್ತ ಜಗತ್ತಿನ ಪರವಾಗಿದೆ. ಜಗತ್ತಿಗೆ ಹೆಗಲು ಕೊಟ್ಟು ಜಗತ್ತಿನ ಚಿಂತೆಯನ್ನು ಹೋಗಲಾಡಿಸುವ, ಜಗತ್ತನ್ನು ಸಂರಕ್ಷಿಸುವ ತಾಕತ್ತು ಭಾರತಕ್ಕಿದೆ.
ನಮ್ಮ ಮುಂದಿನ ಭಾರತ ಇಲ್ಲಿನ ಪುಟ್ಟ ಮಕ್ಕಳು.ಭಾರತ ಮಾತೆ ಅವರಲ್ಲಿ ಬಹಳಷ್ಟು ನಿರೀಕ್ಷೆ ಇರಿಸಿದ್ದಾಳೆ.ದೇಶದ ನೆಮ್ಮದಿ ಹಾಗೂ ಶಾಂತಿಯನ್ನು ಕಾಯ್ದುಕೊಳ್ಳಲು ಮಕ್ಕಳನ್ನು ಶಾರೀರಿಕ, ಮಾನಸಿಕ ಸದೃಢರನ್ನಾಗಿಸಬೇಕು. ಮಾನವೀಯ ಮೌಲ್ಯ, ಸಂಸ್ಕಾರಗಳನ್ನು ಬೋಧಿಸಿ ಅವರಲ್ಲಿ ವ್ಯಕ್ತಿತ್ವ ರೂಪಿಸುವ, ರಾಷ್ಟ್ರಭಕ್ತಿಯನ್ನು ಜಾಗೃತಗೊಳಿಸುವ ಜವಾಬ್ದಾರಿ ಶಿಕ್ಷಣ ಸಂಸ್ಥೆಗಳಿಗಿದೆ. ಸಮಸ್ತ ವಿಶ್ವವನ್ನೇ ಬದಲಿಸುವ ಸಾಮರ್ಥ್ಯ ಅವರಲ್ಲಿ ಬೆಳೆಸಬೇಕು. ಮಕ್ಕಳಿಂದ ರಕ್ಷಕರಿಗೂ ಸಂಸ್ಕಾರ ಸಿಗುವಂತಾಗಬೇಕು.
ನಮ್ಮ ದೇಶದಲ್ಲಿ ಶೇ. 9.5 ಸಜ್ಜನರು, ಶೇ. 5 ಮಂದಿ ದುರ್ಜನರಿದ್ದಾರೆ.ಸಜ್ಜನರಲ್ಲಿ ಶೇ. 93 ಮಂದಿ ತಮ್ಮಷ್ಟಕ್ಕೇ ನಿಷ್ಕ್ರಿಯರಾಗಿದ್ದಾರೆ. ಶೇ. 2 ಮಂದಿ ದೇಶ, ಧರ್ಮ, ಸಂಸ್ಕೃತಿಯ ಬಗ್ಗೆ ಕಾಳಜಿ ಹೊಂದಿದ್ದರೂ ದುರ್ಜನರನ್ನು ಸದೆ ಬಡಿಯುವ ತಾಕತ್ತು ಅವರಲ್ಲಿಲ್ಲ.ನಿಷ್ಕ್ರಿಯರಾದ ಸಜ್ಜನರನ್ನು ಬಡಿದೆಬ್ಬಿಸಿದಲ್ಲಿ ಸುಭದ್ರ ರಾಷ್ಟ್ರ ನಿರ್ಮಾಣದ ಕನಸು ನನಸಾಗುವುದು.
ಸದಾ ಚಟುವಟಿಕೆಯಿಂದಿರುವ ಪುಟ್ಟ ಮೀನುಗಳು ಪ್ರವಾಹದ ವಿರುದ್ಧ ದಿಕ್ಕಿನಲ್ಲಿ ಈಜುವ ಸಾಮರ್ಥ್ಯ ಹೊಂದಿದೆ.ನಮ್ಮ ದೇಶದ ಭದ್ರ ಬುನಾದಿ, ಧರ್ಮ, ಹಾಗೂ ಇಲ್ಲಿನ ಸಂಸ್ಕೃತಿಯನ್ನು ಉಳಿಸಲು ನಾವೆಲ್ಲಾ ಸದಾ ಚಲನಶೀಲರಾಗಬೇಕು.ಕತ್ತಲೆಯಲ್ಲಿ ಸಣ್ಣ ದೀಪವೂ ನಮಗೆ ಬೆಳಕು ತೋರಿಸುವಂತೆ ದೇಶದ ಜನರಲ್ಲಿ ಪ್ರಸ್ತುತ ನೆಲೆಸಿರುವ ಅಜ್ಞಾನ ಹೋಗಲಾಡಿಸಿ, ದೇಶ ಎದುರಿಸುತ್ತಿರುವ ಸಮಸ್ಯೆ, ಸವಾಲುಗಳನ್ನು ಮೆಟ್ಟಿ ನಿಂತು ದೇಶ ಹಿತಕ್ಕಾಗಿ ದಿಟ್ಟ ಹೆಜ್ಜೆ ಇರಿಸಿ ಮುನ್ನುಗ್ಗಲು ನಾವೆಲ್ಲಾ ತಯಾರಾಗಬೇಕು ಎಂದರು.
’ಪೂರ್ವ ಕಾಲದಲ್ಲಿ ಯಜ್ಞ ಯಾಗಾದಿ ಮಂತ್ರ ಪ್ರವೃತ್ತಿಗಳಿಂದ ನಾಡು ಸುಭಿಕ್ಷವಾಗಿತ್ತು.ಅನ್ನ, ವಿದ್ಯೆ, ಔಷಧಿಗಳು ಮಾರಾಟ ವಸ್ತುವಾಗಿರಲಿಲ್ಲ. ಪ್ರಸ್ತುತ ಇವೆಲ್ಲವೂ ದಂಧೆಯಾಗಿ ಮಾರ್ಪಟ್ಟಿದೆ. ಹಾಗೂ ಇದು ಸಮಾಜದ ಹಿತದೃಷ್ಟಿಯಲ್ಲಿ ಕ್ಷೇಮಕರವಲ್ಲ. ಇದೇ ಸ್ಥಿತಿ ಮುಂದುವರಿದರೆ ಮುಂದೆ ಉಸಿರಾಡುವ ಗಾಳಿಯೂ ಮಾರಾಟದ ವಸ್ತುವಾಗಲಿದೆ.ವಿದೇಶೀ ಸಂಸ್ಕೃತಿಯ ಅನುಕರಣೆಯಿಂದ ನಮ್ಮ ಸಂಸ್ಕೃತಿ ಕಲಬೇರಕೆಯಾಗುತ್ತಿದೆ. ಪೂರ್ವಜರು ಧಾರೆ ಎರೆದಿರುವ ಭವ್ಯ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ಹಸ್ತಾಂತರಿಸುವ ಕೆಲಸವನ್ನು ನಾವು ಮಾಡಬೇಕು.ಇಲ್ಲಿನ ದಿವ್ಯ ಸಂಸ್ಕೃತಿ ಉಳಿದರೆ ಮಾತ್ರ ಭಾರತ ವಿಶ್ವ ಗುರುವಾಗಲು ಸಾಧ್ಯ’
ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿಶ್ರೀ ಕ್ಷೇತ್ರ ಕೊಂಡೆವೂರು
ದಿಕ್ಸೂಚಿ ಭಾಷಣದಲ್ಲಿ ಕಜಂಪಾಡಿ ಸುಬ್ರಹ್ಮಣ್ಯ ಭಟ್ ಮಾತನಾಡಿ, ಭಾರತ ಸಂಪದ್ಭರಿತ ದೇಶವೆಂದು ಎಲ್ಲರಿಗೂ ತಿಳಿದ ವಿಚಾರ. ಇಲ್ಲಿನ ಶಿಕ್ಷಣ ವ್ಯವಸ್ಥೆ ಆಧುನಿಕ ಶಿಕ್ಷಣ ಪದ್ಧತಿಯನ್ನು ಮೀರಿಸುವ ರೀತಿಯಲ್ಲಿತ್ತು. ವಿಶ್ವವನ್ನೇ ಬೆರಗಾಗಿಸಿದ ಸಾಂಸ್ಕೃತಿಕ ಪರಂಪರೆ ಹಾಗೂ ಶಿಕ್ಷಣ ಪದ್ಧತಿ ಈ ದೇಶದ ಬೆನ್ನೆಲುಬು.
ಅನಾದಿ ಕಾಲದಿಂದಲೂ ಇದನ್ನು ನಾಶ ಮಾಡುವ ಹಲವು ಪ್ರಯತ್ನಗಳು ನಡೆದಿದೆ.ಸಂಪದ್ಭರಿತ ಭಾರತ ದೇಶವನ್ನು ಮಟ್ಟ ಹಾಕಲೆಂದೇ ಭಾರತಕ್ಕೆ ಕಾಲಿಟ್ಟ ಬ್ರಿಟೀಷರು ಇಲ್ಲಿಯ ಸಂಪತ್ತನ್ನೆಲ್ಲಾ ದೋಚಿದ್ದಲ್ಲದೆ ಶಿಕ್ಷಣ ಕ್ಷೇತ್ರವನ್ನು ಅಲ್ಲೋಲ ಕಲ್ಲೋಲ ಮಾಡಿದ್ದಾರೆ. ಗುರುಕುಲ ಪದ್ಧತಿಯನ್ನು ನಾಶ ಮಾಡಿ ಕಾನ್ವೆಂಟ್ ಶಿಕ್ಷಣವನ್ನು ಭಾರತಕ್ಕೆ ಪರಿಚಯಿಸಿ ಶಿಕ್ಷಣ ಸಂಪ್ರದಾಯವನ್ನೇ ಮರೆಯುವಂತೆ ಮಾಡಿದ್ದಾರೆ.ಶಿಕ್ಷಣ ವ್ಯವಸ್ಥೆಯ ಪುನರುದ್ಧಾರ ನಡೆಸಬೇಕಾಗಿದೆ.ಶಿಕ್ಷಣ/ಹಣ ಗಳಿಕೆಗಷ್ಟೇ ಸೀಮಿತವಲ್ಲ. ದಾರಿ ತಪ್ಪಿದ ಶಿಕ್ಷಣ ವ್ಯವಸ್ಥೆಯನ್ನು ಸರಿದೂಗಿಸಲು ಪರ್ಯಾಯ ಮಾರ್ಗ ಅನುಸರಿಸಬೇಕು.ಮಕ್ಕಳಲ್ಲಿ ಸರ್ವತೋಮುಖ ಮೌಲ್ಯಗಳನ್ನು ಬೆಳೆಸಿ ದೇಶದ ಸತ್ಪ್ರಜೆಗಳನ್ನಾಗಿ ರೂಪಿಸಬೇಕು ಎಂದರು.
ನಾಲಂದಾ ಕಾಲೇಜು ಆಡಳಿತ ಮಂಡಳಿ ಕಾರ್ಯದರ್ಶಿ ಡಾ.ಜಯಗೋವಿಂದ ಉಕ್ಕಿನಡ್ಕ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಶ್ರೇಷ್ಟ ಗುರು ಪರಂಪರೆಯ ಹಿನ್ನೆಲೆಯ ದೇಶ ಭಾರತ.ಇಲ್ಲಿಯ ಚರಿತ್ರೆ ಪುಟ ತೆರೆದಾಗ ಗುಣ ನಡತೆ ಯೋಗ್ಯತೆಗೆ ಅನುಸರಿಸಿ ಸ್ಥಾನ ಮಾನ ನೀಡಲಾಗಿದೆಯೇ ಹೊರತು ಜಾತಿ ಆಧರಿತವಲ್ಲ.ಕುಲೀನ ಕುಲದಲ್ಲಿ ಜನಿಸಿದ ಚಂದ್ರಗುಪ್ತ ಹಾಗೂ ಮಗಧ ಸಾಮ್ರಾಜ್ಯವನ್ನು ಕಟ್ಟಿ ಬೆಳಸಿದ ಅಶೋಕ ಚಕ್ರವರ್ತಿಗೆ ಉತ್ತಮ ಶಿಕ್ಷಣ ನೀಡಿ, ದೇಶ ಪ್ರೇಮ ಮೂಡಿಸಿ ಸಾಮ್ರಾಜ್ಯ ಸ್ಥಾಪಿಸಲು ಕಾರಣರಾದ ಕೀರ್ತಿ ಪುಣ್ಯ ಪುರುಷ ಗುರು ಚಾಣಕ್ಯರಿಗೆ ಸಲ್ಲುತ್ತದೆ. ಚರಿತ್ರೆಯನ್ನು ಗಮನಿಸಿದಾಗ ಎಲ್ಲಾ ಮಹಾ ಪುರುಷರ ಸಾಧನೆಯ ಹಿಂದೆ ಓರ್ವ ಗುರು ನಿರ್ಣಾಯಕ ಪಾತ್ರ ವಹಿಸಿದ್ದಾನೆ.ಸತ್ಪ್ರಜೆಗಳನ್ನು ರೂಪಿಸಿ ಉತ್ತಮ ಸಮಾಜ ನಿರ್ಮಿಸುವಲ್ಲಿ ಶಿಕ್ಷಕರು ಆತ್ಮಾವಲೋಕನ ನಡೆಸಬೇಕಾಗಿದೆ ಎಂದರು.
ಪ್ರಿನ್ಸಿಪಾಲ್ ಡಾ. ವಿಘ್ನೇಶ್ವರ ವರ್ಮುಡಿ ಪ್ರಾಸ್ತಾವಿಕವಾಗಿ ಮಾತನಾಡಿ ಸ್ವಾಗತಿಸಿದರು.ಕಾಲೇಜು ಆಡಳಿತ ಮಂಡಳಿ ಸದಸ್ಯ ರಾಜಶೇಖರ ಪೆರ್ಲ ವಂದಿಸಿದರು. ಶಿಕ್ಷಕಿ ಶಾಂಭವಿ ನಿರೂಪಿಸಿದರು.