ಕೃಷಿ ಯಂತ್ರೋಪಕರಣಗಳ ಹೊಸ ಆವಿಷ್ಕಾರ, ನೂತನ ಪ್ರಯತ್ನಗಳು ನಡೆದಲ್ಲಿ ಕೃಷಿಕರ ಬೆಳವಣಿಗೆ

ಪೆರ್ಲ ನಾಲಂದ ಕಾಲೇಜು ಆವರಣದಲ್ಲಿ ನಡೆದ ’ಕೃಷಿ ಮೇಳ’ದ ಸಮಾರೋಪ ಭಾಷಣದಲ್ಲಿ ನಬಾರ್ಡ್ ಎ.ಜಿ.ಎಂ. ಜ್ಯೋತಿಷ್ ಜಗನ್ನಾಥ್

ಕೃಷಿ ಪರಂಪರೆಯಲ್ಲಿ ಹುಟ್ಟಿ ಬೆಳೆದವರಿಗೆ ಕೃಷಿಯ ಆಸಕ್ತಿ ಕಡಿಮೆಯಾಗುತ್ತಿದೆ. ಕೃಷಿಕರ ಮಕ್ಕಳು ಉದ್ಯೋಗ ಅರಸಿ ಪೇಟೆ ಪಟ್ಟಣ ಸೇರುತ್ತಿರುವುದು ಕಂಡು ಬರುತ್ತಿದೆ. ಪರಂಪರಾಗತ ಕೃಷಿ ರೀತಿ, ಸಾವಯವ ಕೃಷಿ ನೀತಿಯನ್ನು ಪ್ರೋತ್ಸಾಹಿಸುವ ಕೃಷಿ ಮೇಳಗಳು ಅಲ್ಲಲ್ಲಿ ನಡೆಯಬೇಕು. ಕೃಷಿಕರ ಶ್ರಮವನ್ನು ಸರಳಗೊಳಿಸುವ ಯಂತ್ರೋಪಕರಣಗಳ ಅರಿವು, ಪ್ರಾತ್ಯಕ್ಷಿಕೆ ಗ್ರಾಮೀಣ ಕೃಷಿಕರಿಗೆ ಲಭಿಸಬೇಕು ಎಂದು ನಬಾರ್ಡ್ ಎ.ಜಿ.ಎಂ. ಜ್ಯೋತಿಷ್ ಜಗನ್ನಾಥ್ ಹೇಳಿದರು.

ಪೆರ್ಲ ನಾಲಂದ ಮಹಾವಿದ್ಯಾಲಯ, ಕ್ಯಾಂಪ್ಕೋ ಲಿಮಿಟೆಡ್, ಮಂಗಳೂರು ಹಾಗೂ ಪೆರ್ಲ ಸೇವಾ ಸಹಕಾರಿ ಬ್ಯಾಂಕ್ ಸಂಯುಕ್ತ ಆಶ್ರಯದಲ್ಲಿ ಸ್ಥಳೀಯ ಸಂಘ ಸಂಸ್ಥೆಗಳ ಸಹಕಾರದಲ್ಲಿ ಪೆರ್ಲ ನಾಲಂದ ಕಾಲೇಜು ಆವರಣದಲ್ಲಿ ಬೃಹತ್ ’ಕೃಷಿ ಮೇಳ’ದ ಸಮಾರೋಪ ಸಮಾರಂಭ ಮುಖ್ಯ ಭಾಷಣದಲ್ಲಿ ಮಾತನಾಡಿದರು.

ಕೇಂದ್ರ ಸರಕಾರ ಈ ಬಾರಿಯ ಬಜೆಟ್ ನಲ್ಲಿ ಕೃಷಿ ಸಾಲ ಮೊತ್ತ ಏರಿಸಿದೆ.ಕೃಷಿಕರನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಪ್ರತಿ ವರ್ಷ ಸಹಾಯ ಧನ ಒದಗಿಸುತ್ತಿದೆ.ಜೈವ ಕೃಷಿಗೆ ಬಹಳಷ್ಟು ಅನುದಾನ ಮೀಸಲಿರಿಸಿದೆ. ಕೃಷಿ ಉತ್ಪನ್ನ ಕೆಡದಂತೆ, ಶೀಘ್ರವಾಗಿ ಮಾರುಕಟ್ಟೆ ತಲಪಿಸಲು ಕಿಸಾನ್ ರೈಲು ಆರಂಭಿಸುವ ಸೂಚನೆ ನೀಡಿದೆ.

ಭಾರತದ ಸಂಸ್ಕೃತಿಯಲ್ಲಿ ಗೋವುಗಳಿಗೆ ಪ್ರಧಾನ ಪಾತ್ರವಿದೆ. ಕಾಸರಗೋಡು ಗಿಡ್ಡ ತಳಿ ಔಷಧೀಯ ಗುಣದ ಹಾಲಿಗೆ ಪ್ರಸಿದ್ಧಿ ಪಡೆದಿದೆ. ಗೋಮೂತ್ರ, ಹಾಲು, ಸೆಗಣಿ ಸೇರಿ ಇನ್ನಿತರ ಗೋ ಉತ್ಪನ್ನಗಳಲ್ಲಿ ಔಷಧೀಯ ಗುಣಗಳಿರುವುದು ಸಂಶೋಧನೆಯಲ್ಲಿ ದೃಢಪಟ್ಟಿವೆ.

ಕೇರಳದಲ್ಲಿ ಅತಿ ಹೆಚ್ಚು 20,200 ಹೆಕ್ಟೇರ್ ಅಡಕೆ ಕೃಷಿ ತೋಟ ಕಾಸರಗೋಡು ಜಿಲ್ಲೆಯಲ್ಲಿ ವ್ಯಾಪಿಸಿದೆ. ಅಡಿಕೆ ಕೊಯ್ಲು, ಔಷಧಿ ಸಿಂಪಡಣೆಗೆ ಅಡಕೆ ಮರ ಏರ ಬೇಕಾಗಿದೆ. ಅಡಕೆ ಮರ ಏರಿ ಮೇಲೆ ಕುಳಿತು ಔಷಧಿ ಸಿಂಪಡಣೆ, ಅಡಿಕೆ ಕೊಯ್ಲು ನಡೆಸುವುದು ಸುಲಭದ ಕೆಲಸವಲ್ಲ. ಕಾರ್ಮಿಕರ ಸಮಸ್ಯೆ ಕೃಷಿಕರಿಗೆ ಬಹು ದೊಡ್ಡ ಸಮಸ್ಯೆಯಾಗಿದೆ. ಇದನ್ನು ನೀಗಿಸಲು ವಿಭಿನ್ನ ಪ್ರಯತ್ನಗಳು ನಡೆಯುತ್ತಲೇ ಇವೆ.

ಒಂದು ಕಡೆ ಯಂತ್ರಗಳ ಆವಿಷ್ಕಾರ ನಡೆಯುತ್ತಿದ್ದರೆ ಮತ್ತೂಂದು ಕಡೆ ಸುಲಭ ಹಾಗೂ ರಕ್ಷಣಾತ್ಮಕವಾಗಿ ಮರ ಏರುವ ಅಧ್ಯಯನ, ಪ್ರಯತ್ನ ಗಳು ನಡೆಯುತ್ತಿವೆ.ಅಡಕೆ ಮರ ಏರುವ, ಔಷಧಿ ಸಿಂಪಡಣೆ, ಒಣ ಅಡಕೆ ಸುಲಿಯುವ ಮತ್ತಿತರ ಕೃಷಿ ಯಂತ್ರೋಪಕರಣಗಳ ಹೊಸ ಹೊಸ ಆವಿಷ್ಕಾರಗಳು ನಡೆಯಿತ್ತಿವೆ. ಕೃಷಿ ಶ್ರಮ ಸರಳ ಗೊಳಿಸುವ ಆಧುನಿಕ ಅವಿಷ್ಕಾರಗಳು ಹಾಗೂ ನೂತನ ಪ್ರಯತ್ನಗಳನ್ನು ಮಾಡಿದಾಗ ಮಾತ್ರ ಕೃಷಿಕರ ಬೆಳವಣಿಗೆ ಸಾಧ್ಯ ಎಂದರು.

ಮಲ್ಲ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರ, ನಾಲಂದ ಕಾಲೇಜು ಆಡಳಿತ ಮಂಡಳಿ ಅಧ್ಯಕ್ಷ ಆನೆಮಜಲು ವಿಷ್ಣು ಭಟ್ ಅಧ್ಯಕ್ಷತೆ ವಹಿಸಿದರು.

ಪ್ರಗತಿಪರ ಕೃಷಿಕ ಡಾ. ಚಂದ್ರಶೇಖರ ಚೌಟ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಮಾತನಾಡಿ, ಕೃಷಿ ಕ್ಷೇತ್ರದಲ್ಲಿ ಸಾಕಷ್ಟು ಬದಲಾವಣೆಯಾಗಿದೆ. ರಾಸಾಯನಿಕಗಳ ಬಳಕೆಯಿಂದ ಜೇನು ನೊಣಗಳು ನಾಶವಾಗುತ್ತಿದೆ. ಇದರಿಂದ ಪರಾಗಸ್ಪರ್ಶ ಕ್ರಿಯೆಗೆ ಚ್ಯುತಿ ಉಂಟಾಗುತ್ತಿದೆ. ಪರಾಗಸ್ಪರ್ಶ ಕ್ರಿಯೆ ಅನುಕೂಲತೆಗೆ ಸ್ವಯಂ ಕೃಷಿಕರೇ ಪರಿಹಾರ ಕಂಡುಕೊಳ್ಳಬೇಕು. ಮಣ್ಣಿನ ಸತ್ವ ಪರೀಕ್ಷೆ ನಡೆಸಿ ಯೋಗ್ಯ ಕೃಷಿ ಬೆಳೆಸಬೇಕು ಎಂದರು.

ಪುತ್ತೂರು ವಿವೇಕಾನಂದ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಡಾ.ಕೆ.ಎಂ.ಕೃಷ್ಣ ಭಟ್ ಮಾತನಾಡಿದರು. ಕ್ಯಾಂಪ್ಕೋ ಮಂಗಳೂರು ಉಪಾಧ್ಯಕ್ಷ ಶಂ.ನಾ.ಖಂಡಿಗೆ ಸ್ವಾಗತಿಸಿದರು. ನಾಲಂದ ಕಾಲೇಜು ಆಡಳಿತ ಮಂಡಳಿ ಸದಸ್ಯ ರಾಜಶೇಖರ್ ಪೆರ್ಲ ವಂದಿಸಿದರು. ಉಪನ್ಯಾಸಕಿ ಅಮೃತ, ವಿನೀಶಾ ನಿರೂಪಿಸಿದರು.