ಪೆರ್ಲ: ವಿದ್ಯಾರ್ಥಿಯನ್ನು ಪರಿವರ್ತನೆಯ ದಾರಿಯಲ್ಲಿ ಕೊಂಡೊಯ್ಯುವ ಸೇವಾ ಯೋಜನೆ ಶಿಬಿರಗಳು ಅವರ ವ್ಯಕ್ತಿತ್ವ ಬೆಳವಣಿಗೆಯಲ್ಲಿ ಪ್ರಧಾನ ಪಾತ್ರವಹಿಸುವುದು. ಸಮಾಜದಲ್ಲಿ ಗೌರವಯುತ ಸ್ಥಾನ ದೊರೆಯುವಂತೆ ಹಾಗೂ ಉತ್ತಮ ಬಾಳ್ವೆ ನಡೆಸಲು ಸಹಕಾರಿ ಎಂದು ಸಿಬಿಐ ಬೆಂಗಳೂರು ಪಬ್ಲಿಕ್ ಪ್ರಾಸಿಕ್ಯೂಟರ್ ಶಿವಾನಂದ ಪೆರ್ಲ ಹೇಳಿದರು.
ಪೆರ್ಲ ನಾಲಂದ ಕಾಲೇಜು ಎನ್ನೆಸ್ಸೆಸ್ ಘಟಕ, ಗ್ರಾಮ ವಿಕಾಸ ಸಮಿತಿ ಸೇವಾ ಯೋಜನೆ ಭಾಗವಾಗಿ ನಾಲಂದ ಚಾರಿಟೇಬಲ್ ಟ್ರಸ್ಟಿ, ವಿವೇಕಾನಂದ ಶಿಶುಮಂದಿರ ಸಮಿತಿ ಅಧ್ಯಕ್ಷೆ ನಳಿನಿ ಸೈಪಂಗಲ್ಲು ಅವರ ಮನೆಯಲ್ಲಿ ನಡೆದ ಸಭೆಯಲ್ಲಿ ಮಾತನಾಡಿದರು.
ಶಿಬಿರದಲ್ಲಿ ಭಾಗವಹಿಸುವ ವಿದ್ಯಾರ್ಥಿಗಳಲ್ಲಿ ಹಲವು ಬದಲಾವಣೆಗಳನ್ನು ಕಾಣಬಹುದು.ಅನುಭವ ಶ್ರೀಮಂತಿಕೆ, ದೃಢತೆ, ಆತ್ಮವಿಶ್ವಾಸ, ಬೌದ್ಧಿಕ ಬೆಳವಣಿಗೆಗೆ ಪೂರಕವಾದ ಸೇವಾ ಶಿಬಿರಗಳು ಸಮಾನತೆ, ಸಹ ಬಾಳ್ವೆ, ವಿಶ್ವಾಸ, ಜವಾಬ್ದಾರಿ ನಿರ್ವಹಣೆಯಂತಹ ಮೌಲ್ಯಗಳನ್ನು ಕಲಿಸುತ್ತದೆ.ಸಾಮಾಜಿಕ, ಜನಪರ ಕಾಳಜಿಯೊಂದಿಗೆ ಗ್ರಾಮದ ಸಮಸ್ಯೆಗಳನ್ನು ನೀಗಿಸುವ ಶ್ರಮದಾನಗಳು ಜನರಲ್ಲಿ ಜಾಗೃತಿ ಮೂಡಿಸುವುದು.ಪೂರ್ವ ತಯಾರಿ, ಕಠಿಣ ಪರಿಶ್ರಮ ಜೀವನದ ಗುರಿ ಸಾಧಿಸುವ ಸುಲಭ ಮೆಟ್ಟಿಲುಗಳು. ಸಾಮಾಜಿಕ ಕಾಳಜಿ ನಿಮ್ಮದಾಗಿದ್ದಲ್ಲಿ ಸಮಾಜ ನಿಮ್ಮನ್ನು ಸುಲಭವಾಗಿ ಗುರುತಿಸುವುದು ಎಂದರು.
ನಳಿನಿ ಸೈಪಂಗಲ್ಲು ಮಾತನಾಡಿ, ಎನ್ನೆಸ್ಸೆಸ್ ಚಟುವಟಿಕೆಗಳು ವೈಯುಕ್ತಿಕ ಜೀವನದ ಅಭಿವೃದ್ಧಿಯ ಪ್ರಥಮ ಮೇಟ್ಟಿಲು ಎಂದರು. ಕಾಲೇಜು ಎನ್ನೆಸ್ಸೆಸ್ ಯೋಜನಾಧಿಕಾರಿ ಸುರೇಶ್ ಕೆ.ಎಂ. ಮಾತನಾಡಿ, ಪೆರ್ಲ ಸ್ವರ್ಗ ರಸ್ತೆಯಲ್ಲಿ ದಟ್ಟವಾಗಿ ಬೆಳೆದು ನಿಂತ ಕಳೆನಾಶಕ ಬಳ್ಳಿಯ ಅಪಾಯ ಸಾಧ್ಯತೆಯನ್ನು ಮನಗಂಡು ಕಾಲೇಜು ಪ್ರಾಂಶುಪಾಲರಲ್ಲಿ ಬಳ್ಳಿಯ ತೆರವು ಗೊಳಿಸುವ ಬಗ್ಗೆ ಪ್ರಸ್ತಾಪ ಇರಿಸಿದ್ದು ಅವರು ಕೂಡಲೇ ಸಮ್ಮತಿಸಿ ಕಾಲೇಜು ಎನ್ನೆಸ್ಸೆಸ್ ಹಾಗೂ ಗ್ರಾಮ ವಿಕಾಸ ಸಮಿತಿ ನೇತೃತ್ವದಲ್ಲಿ ಕಾಡು ಬಳ್ಳಿಗಳನ್ನು ಶೀಘ್ರವಾಗಿ ತೆರವು ಗೊಳಿಸುವಂತೆ ಸೂಚಿಸಿದ್ದು ಇಂದಿನ ಚಟುವಟಿಕೆ ನಡೆದಿದೆ.ಸಾಮಾಜಿಕ ಸಮಸ್ಯೆಗಳ ಅರಿವು, ಜನಪರ ಕಾಳಜಿ, ಕಷ್ಟ ಸುಖಗಳ ಅರಿವು ವಿದ್ಯಾರ್ಥಿಗಳ ಸರ್ವತೋಮುಖ ಬೆಳವಣಿಗೆಗೆ ಸಹಕಾರಿ ಎಂದರು.
ಗ್ರಾಮ ವಿಕಾಸ ಸಮಿತಿ ಅಧ್ಯಕ್ಷ ಕೆ.ವೈ.ಸುಬ್ರಹ್ಮಣ್ಯ ಭಟ್ ಪ್ರಾಸ್ತಾವಿಕವಾಗಿ ಸ್ವಾಗತಿಸಿ, ಸ್ಥಳೀಯ ಸಮಸ್ಯೆಗಳ ಬಗ್ಗೆ ಜನರಲ್ಲಿ ಅರಿವು ಹಾಗೂ ಜಾಗೃತಿ ಮೂಡಿಸುವ ಅಗತ್ಯವನ್ನು ತಿಳಸಿದರು. ಕನ್ನಟಿಕಾನ ಮುನವ್ವಿರಲ್ ಶಾಲಾ ಶಿಕ್ಷಕ ಮಾಧವನ್ ನಂಬೂದಿರಿ, ಜಗದೀಶ್ ಸೈಪಂಗಲ್ಲು, ಗ್ರಾಮ ವಿಕಾಸ ಸಮಿತಿ ಉಪಾಧ್ಯಕ್ಷ ಜಗದೀಶ್ಚಂದ್ರ ಕುತ್ತಾಜೆ, ಪೆರ್ಲ ಹಾಲು ಉತ್ಪಾದಕರ ಸಂಘ ಕಾರ್ಯದರ್ಶಿ ಚೇತನಾ ಕೆ., ವಿಜಯಲಕ್ಷ್ಮಿ ಭಟ್ ಸಾಮಾಜಿಕ ಕಾರ್ಯಕರ್ತ ವೆಂಕಟ್ರಮಣ ಭಟ್ ಎಡಮಲೆ, ಮುರಳೀಧರ ಸೈಪಂಗಲ್ಲು, ಸುದರ್ಶನ ಸಮಿತಿಯ ಅಜಿತ್ ಸ್ವರ್ಗ, ಕಿಶನ್ ಕುತ್ತಾಜೆ, ನಾಲಂದ ಕಾಲೇಜು ಉಪನ್ಯಾಸಕರಾದ ಶ್ರೀನಿಧಿ, ನಿವೇದಿತ, ಶಿಶು ಮಂದಿರ ಸಹಾಯಕಿ ಹೇಮಲತ ಎನ್ನೆಸ್ಸೆಸ್ ಪದಾಧಿಕಾರಿಗಳು, ಸದಸ್ಯರು ಉಪಸ್ಥಿತರಿದರು.