ಪ್ರಾಕೃತಿಕ ಸಂಪನ್ಮೂಲಗಳನ್ನು ಮುಂದಿನ ತಲೆಮಾರಿಗೆ ಹಸ್ತಾಂತರಿಸುವುದು ಪ್ರತಿಯೊಬ್ಬನ ಕರ್ತವ್ಯ

ನಾಲಂದ ಕಾಲೇಜಿನಲ್ಲಿ ನಡೆದ ವಿಶ್ವ ಜಲ ದಿನಾಚರಣೆಯಲ್ಲಿ ಉಪನ್ಯಾಸಕಿ ಶಿಲ್ಪಾ ಎಸ್ ಹೆಗ್ಡೆ

ಭೂಮಿಗೆ ಪ್ರಕೃತಿದತ್ತವಾಗಿ ಬಂದ ಅಮೂಲ್ಯ ಸಂಪನ್ಮೂಲಗಳನ್ನು ಉಳಿಸಿ ಮುಂದಿನ ತಲೆಮಾರಿಗೆ ಹಸ್ತಾಂತರಿಸುವುದು ನಮ್ಮೆಲ್ಲರ ಕರ್ತವ್ಯ ಎಂದು ನಾಲಂದ ಕಾಲೇಜು ಸ್ಟೇಟಿಸ್ಟಿಕ್ಸ್ ವಿಭಾಗ ಉಪನ್ಯಾಸಕಿ ಶಿಲ್ಪಾ ಎಸ್.ಹೆಗ್ಡೆ ಹೇಳಿದರು.

ಪೆರ್ಲ ನಾಲಂದ ಮಹಾವಿದ್ಯಾಲಯದ ಎನ್ನೆಸ್ಸೆಸ್ ಘಟಕ ನೇತೃತ್ವದಲ್ಲಿ ಜರಗಿದ ವಿಶ್ವ ಜಲ ದಿನಾಚರಣೆ ಸಮಾರಂಭದಲ್ಲಿ ಮಾತನಾಡಿದರು.

ನೀರಿನ ಕೊರತೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಜನಸಂಖ್ಯಾ ಹೆಚ್ಚಳ, ನೀರಿನ ದುರ್ಬಳಕೆ, ಜಲ ಸಂರಕ್ಷಣೆಗೆ ಹೆಚ್ಚಿನ ಆದ್ಯತೆ ನೀಡದಿರುವುದು, ಹವಮಾನ ಬದಲಾವಣೆ ಇತ್ಯಾದಿಗಳು ಪ್ರಮುಖ ಕಾರಣಗಳಾಗಿವೆ.

ಭೂಮಿಯ ಶೇ. 71 ರಷ್ಟು ಭಾಗ ಜಲಾವೃತವಾಗಿದ್ದರೂ ಅದರಲ್ಲಿ ಶೇ. 3 ರಷ್ಟು ಮಾತ್ರ ಕುಡಿಯಲು ಯೋಗ್ಯ.ಉಳಿದ ಶೇ. 97 ರಷ್ಟು ಉಪ್ಪಿನಿಂದ ಕೂಡಿದ್ದು ಬಳಕೆಗೆ ಯೋಗ್ಯವಾಗಿಲ್ಲ.ಬಳಕೆಗೆ ಯೋಗ್ಯದ ಶುದ್ಧ ನೀರಿನಲ್ಲಿ ಶೇ. 2.061 ರಷ್ಟು ನೀರು ಹಿಮರೂಪ ಹಾಗೂ ಶೇ. 0.903 ರಷ್ಟು ಶುದ್ಧ ನೀರು ಭೂಗರ್ಭದಲ್ಲಿದೆ. ಶೇ. 0.006 ರಷ್ಟು ಪ್ರಮಾಣದ ನೀರು ಭೂಮಿಯ ಮೇಲೆ ನದಿ, ಸರೋವರ, ಕೆರೆ, ಬಾವಿಯಲ್ಲಿ ಲಭಿಸಿದರೂ ಅದರಲ್ಲಿ ಶೇ. 0.027 ರಷ್ಟು ನೀರು ಬಾಷ್ಪೀಕರಣಗೊಂಡು ಅನಿಲ ರೂಪಕ್ಕೆ ತಿರುಗುತ್ತಿವೆ. ಇಂಗು ಗುಂಡಿ ನಿರ್ಮಾಣ, ಗಿಡ ಮರಗಳನ್ನು ನೆಟ್ಟು ಬೆಳೆಸುವುದು, ಮಳೆ ನೀರ ಕೊಯ್ಲು, ಹೈಡ್ರೋಫೋನಿಕ್ ಕೃಷಿ ವಿಧಾನಗಳನ್ನು ಅನುಸರಿಸಿ ನೀರಿನ ಮಿತ ಬಳಕೆಯನ್ನು ನಾವು ರೂಢಿಸಬೇಕು. ಯುವ ಜನಾಂಗ ಜಲ ಸಂರಕ್ಷಣೆಗೆ ಒತ್ತಿ ನೀಡಬೇಕು. ನೀರಿನ ಬೆಲೆ ಅರಿತು ಜಲ ಸಂರಕ್ಷಣೆಯಲ್ಲಿ ಪ್ರತಿಯೊಬ್ಬರೂ ತೊಡಗಿದರೆ ತಕ್ಕ ಮಟ್ಟಿನ ಜಲ ಕ್ಷಾಮ ಪರಿಹಾರ ಸಾಧ್ಯ ಎಂದರು.

ಎನ್ನೆಸ್ಸೆಸ್ ಯೋಜನಾಧಿಕಾರಿ ಸುರೇಶ್ ಕೆ.ಎಂ. ಮಾತನಾಡಿ, ಮಿತ ಬಳಕೆಯಿಂದ ನೀರನ್ನು ಉಳಿಸದೇ ಇದ್ದಲ್ಲಿ ಮುಂದಿನ ದಿನಗಳಲ್ಲಿ ನೀರಿಗಾಗಿ ಯುದ್ಧ ಮಾಡುವ ಪರಿಸ್ಥಿತಿ ಬರಲಿದೆ. ನೀರಿನ ಮಹತ್ವದ ಅರಿವು ಜನರಲ್ಲಿ ಮೂಡಿಸುವುದು ಅಗತ್ಯ ಎಂದರು.

ವಿದ್ಯಾರ್ಥಿನಿಯರಾದ ಮೇಘ ಸ್ವಾಗತಿಸಿ, ಭುವನ ವಂದಿಸಿದರು. ದೀಕ್ಷಾ ನಿರೂಪಿಸಿದರು.