ಎನ್‌ಎಸ್‌ಎಸ್ ಸೇವಾ ಯೋಜನೆಯ ಯುವ ಮನಸ್ಸುಗಳಿಂದ ಬಸ್ ನಿಲ್ದಾಣ, ಶ್ರಮದಾನದಂತಹ ಕಾರ್ಯಗಳು ಯಶಸ್ವಿಯಾಗಿ ನಡೆದುದು ಇತರರಿಗೆ ಮಾದರಿ ಕಾರ್ಯ. ಸಂಕೇತಿಕವಾಗಿ ಸಾಕಾರಗೊಂಡ ಎಲ್ಲ ಕಾರ್ಯಗಳು ಕೂಡಾ ನಮ್ಮೂರಿಗೆ ಮಹತ್ತರ ಕೊಡುಗೆಯನ್ನು ನೀಡುತ್ತದೆ ಎಂದು ಬಸ್ ನಿಲ್ದಾಣವನ್ನು ಉದ್ಘಾಟಿಸಿದ ಎಣ್ಮಕಜೆ ಗ್ರಾಮ ಪಂಚಾಯತ್ ಅಧ್ಯಕ್ಷೆ ರೂಪವಾಣಿ ಆರ್.ಭಟ್ ನುಡಿದರು. ಅವರು ನಲ್ಕ ಎನ್‌ಎಸ್‌ಎಸ್ ಸೇವಾ ಯೋಜನೆಯ ವಿದ್ಯಾರ್ಥಿಗಳು ಶ್ರಮದಾನ ಮೂಲಕ ನಿರ್ಮಿಸಿದ ಬಸ್ ನಿಲ್ದಾಣವನ್ನು ಉದ್ಘಾಟಿಸಿ ಮಾತನಾಡಿದರು.
ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಪೆರ್ಲ ನಾಲಂದ ಮಹಾವಿದ್ಯಾಲಯದ ಆಡಳಿತ ಮಂಡಳಿಯ ಕಾರ್ಯದರ್ಶಿ ಡಾ|ಜಯಗೋವಿಂದ ಅವರು ಮಾತನಾಡಿ “ಯಾವುದೇ ಪ್ರತಿಫಲ ಅಪೇಕ್ಷೆಯಿಲ್ಲದೆ ಮಾಡಿದಂತಹ ಸಮಾಜ ಸೇವೆ ಉಳಿದವರಿಗೆ ಪ್ರೇರಣೆಯನ್ನು ನೀಡುತ್ತದೆ. ೨೦೦೭ರಿಂದ ನಾಲಂದ ಕಾಲೇಜಿನಲ್ಲಿ ನಡೆದು ಬರುತ್ತಿರುವ ಎನ್‌ಎಸ್‌ಎಸ್ ಸೇವಾ ಯೋಜನೆಯ ಹಿಂದಿರುವ ಗುರುವೃಂದ ಮತ್ತು ಮಾರ್ಗದರ್ಶಕರನ್ನು ಶ್ಲಾಘಿಸಬೇಕಾದುದು ಅನಿವಾರ್ಯ. ವಿದ್ಯಾರ್ಥಿಯೊಳಗಿನ ಶಕ್ತಿ , ಸ್ವಾಭಿಮಾನ ಮತ್ತು ನಾಯಕತ್ವದ ಗುಣ ರೂಪಿಸಿಕೊಳ್ಳಲು ಎನ್‌ಎಸ್‌ಎಸ್ ಘಟಕ ಒಂದು ಚೈತನ್ಯವೆಂದರೂ ಅತಿಶಯೋಕ್ತಿಯಾಗಲಾರದೆಂದು ನುಡಿದರು.
ಗಿಳಿವಿಂಡು ಮಂಜೇಶ್ವರ ಇದರ ಅಡಳಿತ ಅಧಿಕಾರಿ ಡಾ|ಕಮಲಾಕ್ಷ ಅವರು ಮಾತನಾಡಿ “ಎನ್‌ಎಸ್‌ಎಸ್ ನಾನಲ್ಲ ನೀನು ಎನ್ನುವ ತತ್ವ ಮತ್ತು ದ್ಯೇಯತೆಯನ್ನು ಹೊಂದಿದ್ದು ಸ್ವಾರ್ಥರಹಿತ ಸಮಾಜ ಸೇವೆಯನ್ನು ಬೋಧಿಸುತ್ತದೆ. ಮಕ್ಕಳಲ್ಲಿರುವ ಕೀಳರಿಮೆ ದೂರವಾಗಿ ಸ್ವಯಂಸೇವಕರಾಗಿ ಸಂಘಟನಾತ್ಮಕರಾಗಬೇಕು. ಯುವ ಸಮಾಜ ಅರಳುತ್ತಿರುವ ಸಹಸ್ರದಳ ಕಮಲದಂತೆ.ವ್ಯಕ್ತಿತ್ವ ವಿಕಸನಗೊಳ್ಳುತ್ತಿರುವಂತಹ ಈ ರೀತಿಯ ಶಿಬಿರಗಳಲ್ಲಿ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಳ್ಳಲು ಬೇಕಾದಷ್ಟು ಅವಕಾಶಗಳಿವೆ ಅಂತಹ ಅವಕಾಶಗಳನ್ನು ಸದುಪಯೋಗಿಸಿಕೊಳ್ಳಬೇಕಾದುದು, ಸೂಕ್ತ ರೀತಿಯಲ್ಲಿ ಬಳಸಿಕೊಳ್ಳಬೇಕಾದುದು ಶಿಬಿರಾರ್ಥಿಗಳ ಕರ್ತವ್ಯವೆಂದು ನುಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆವಹಿಸಿದ ನಾಲಂದ ಮಹಾವಿದ್ಯಾಲಯದ ಆಡಳಿತಾಧಿಕಾರಿ ಶಿವಕುಮಾರ್ . ಕೆ ಅವರು ” ಸೇವೆ ಮಾಡಬೇಕೆಂದರೆ ಒಂದು ಒಳ್ಳೆ ಮನಸು ಬೇಕಾದುದು ಅಷ್ಟೇ.., ನನ್ನಿಂದ ಅಲ್ಲ ನಿನ್ನಿಂದ ಎನ್ನುವಂತಹ ತತ್ವ ಸಿದ್ಧಾಂತ ಎನ್‌ಎಸ್‌ಎಸ್ ನ ಸಾಮಾಜಿಕ ಕಳಕಳಿ ಮತ್ತು ನಮ್ಮೊಳಗಿನ ಪರೋಪಾರವನ್ನು ಜಾಗೃತಗೊಳಿಸುತ್ತದೆ. “ಮನಸು ತಿಳಿಯಾಗಿರಲಿ” ಎನ್ನುವಂತಹ ಧ್ಯೇಯ ಗೀತೆ ಮನಸು ತಿಳಿಯಾಗಿದ್ದರೆ ಸಮಜ ಕೂಡಾ ತಿಳಿಯಾಗಿಸಬಹುದೆನ್ನುವ ಸಾರವನ್ನು ಸಾರುತ್ತದೆ. ಸೇವಾ ಮನೋಭಾವ ಒಂದು ಅನುಭವವಾಗುತ್ತದೆ.ಪ್ರಾಮಾಣಿಕ ಮತ್ತು ಶಿಸ್ತಿನ ಜೊತೆಗೆ ಬದುಕುವ ಕಲೆಯನ್ನು ಕಲಿಸುತ್ತದೆ.ನಾವು ಗಳಿಸಿದ ಹಣವೋ ಸಂಪತ್ತು, ಹೆಸರುಗಳೋ ನಮ್ಮ ಬದುಕಿಗೆ ಉನ್ನತಿಯನ್ನು ನೀಡುವುದಿಲ್ಲ ಆದರೆ ನಾವು ಮಾಡಿದಂತಹ ಕರ್ಮಗಳ ಜೊತೆಗೆ ನಮ್ಮ ತ್ಯಾಗ ಮತ್ತು ಪರಿಶ್ರಮ ನಮ್ಮ ಶ್ರೇಯಸ್ಸು ಮತ್ತು ಯಶಸ್ಸನ್ನು ಒದಗಿಸುತ್ತದೆ ಎಂದು ನುಡಿದರು.
ಎನ್‌ಎಸ್‌ಎಸ್ ಶಿಬಿರ ನಿರ್ದೇಶಕರಾದ ಅಶೋಕ ಎಂ ಶಿಬಿರದ ಮೌಲ್ಯಾಮಾಪನ ನಡೆಸಿದರು.ಕೇರಳ ರಾಜ್ಯ ಕಿರುಕೈಗಾರಿಕಾ ಸಂಘದ ಉಪಾಧ್ಯಕ್ಷರಾದ ರಾಜಾರಾಮ ಪೆರ್ಲ,ಎಣ್ಮಕಜೆ ಗ್ರಾಮಪಂಚಾಯತ್ ಸ್ಥಾಯೀ ಸಮಿತಿ ಅಧ್ಯಕ್ಷರಾದ ಉದಯ ಚೆಟ್ಟಯಾರ್ , ಎಣ್ಮಕಜೆ ಗ್ರಾಮ ಪಂಚಾಯತ್ ಸದಸ್ಯರಾದ ಸತೀಶ್ ಕುಲಾಲ್ ನಲ್ಕ, ಎಸ್‌ವಿಎಯುಎಲ್‌ಪಿ ಶಾಲಾ ಮುಖ್ಯೋಪಾಧ್ಯಾರಾದ ಶ್ರೀಪತಿ ಭಟ್, ಎಸ್‌ವಿಎಯುಎಲ್‌ಪಿ ಶಾಲಾ ಅಧ್ಯಾಪಿಕೆ ಪಾರ್ವತಿ ಟೀಚರ್, ಪದ್ಮಶೇಖರ ನೇರೊಳು, ಅಬ್ಬಾಸ್ ನಲ್ಕ ,ಎನ್‌ಎಸ್‌ಎಸ್ ಶಿಬಿರ ಜತೆ ಕಾರ್ಯದರ್ಶಿ ವಿಕಾಸ್ ಭಟ್,ಎನ್‌ಎಸ್‌ಎಸ್ ಶಿಬಿರ ಕಾರ್ಯದರ್ಶಿ ಪ್ರದೀಪ್,ವಿತೇಶ್,ಕು.ಅರ್ಪಿತ,ಕು.ಪವಿತ್ರ ಕಾರ್ಯಕ್ರಮಕ್ಕೆ ಶುಭ ಹಾರೈಸಿದರು.ಕುಮಾರ ನಾರಾಯಣ ಕೆ ಸ್ವಾಗತಿಸಿ, ಎನ್‌ಎಸ್‌ಎಸ್ ಯೋಜನಾಧಿಕಾರಿ ಶಂಕರ ಖಂಡಿಗೆ ವಂದಿಸಿದರು.